مهما كان نوع البشرة لا بُدّ من العناية بها يومياً، حتى تُحافظ على نضارتها وحيويتها، وبالرغم من توفر العديد من المنتجات التي قد تجعل السيدة تقع في الحيرة لاختيار الأنسب فيما بينها، إلا أنّ هناك عادات أساسية يجب اتباعها للعناية اليومية بالبشرة، وسنتعرف على أهم الخطوات للعناية اليومية بالبشرة
من العوامل التي تأثر على بشرتنا زي العمر, الجو, التوتر وغيرها من العوامل اللي تسبب مشاكل الجلد ، وللوقاية من هذه المشاكل ، لابد من العناية بالبشرة في سن مبكر
17 ماسك لبشرة خالية من العيوب
بأبسط المكونات*************
وصفات طبيعية لبشرة صحية****
ماسك عصير الليمون + البابايا:
البابايا من مضادات الاكسدة القوية بسبب احتوائها على نسبة عالية من فيتامين A ، بالاضافة انها بتحتوي على مادة الباباين اللي بتساعد على ازالة خلايا الجلد الميتة ، وليها تأثير مجدد لانها بتحتوي على كمية كبيرة من احماض الفا هيدروكسي (AHA( ، وعصير الليمون بيساعد على علاج البقع الغامقة على البشرة وبيحسن لون البشرة وبيفتحها.
امزجي 1 معلقة كبيرة من البابايا المهروسة مع 4 نقط من عصير الليمون ، وزعي الخليط على البشرة وسيبيه لمدة 10 – 12 دقيقة ، وبعدها اغسليه بالماية الباردة.
ماسك القهوة والطين:
الماسك ده بيساعد على تنضيف وتقشير البشرة وتجديدها.
المكونات:
2 معلقة صغيرة طين.
1 معلقة صغيرة بن.
من 1 – 1 ½ معلقة صغيرة خل التفاح.
من 2 – 3 نقط زيت شجرة الشاي.
الطريقة:
في طبق ازاز او بلاستيك اخلطي المكونات كلها مع بعض بمعلقة خشب او بلاستيك بردو عشان الطين ميتفاعلش مع المعدن, افردي الخليط على البشرة وسيبيه من 5 – 15 دقيقة لحد ما الماسك ينشف على البشرة, بعدها اغسليه بمية دافية وانتي بتدلكي البشرة في حركات دائرية ثم نشفيها ورطبيها بالكريم.
ماسك الطماطم + صودا الخبز:
الماسك ده بيحتوي على كتير من الفيتامينات ، فيتامين B9 بيقضي على حب الشباب ، وفيتامين A بيحارب جفاف البشرة ، وفيتامين K بيزيل التصبغ ، وفيتامين H والزنك هيساعدوا خلايا بشرتك على التجدد ، والبوتاسيوم بيرطب البشرة ، والكالسيوم بينعم الجلد ، والكولين بيجدد البشرة ويلطفها.
اعصري حبة طماطم واحدة ، وضيفي لها 2 معلقة كبيرة من صودا الخبز (كربوناتو) ، وزعي الخليط على بشرتك وسيبيه لمدة 10 دقايق ، وبعدها اغسلي بشرتك بالماية.
ماسك الخيار +الكركم:
كلنا بنحب مستحضرات التجميل اللي بتحتوي على الخيار ، لانه بيرطب البشرة بشكل كبير جدا ، بالاضافة انه بيحتوي على خصائص قابضة ، وده معناه شد الجلد وتقليل المسام بعد استخدام الماسك ده ، والكركم يعتبر مطهر طبيعي وبيساعد على تجديد شباب البشرة.
اخلطي حبة خيار في الخلاط وضيفي لها 1 معلقة صغيرة كركم ، وزعي الخليط على البشرة وسيبيه لمدة 10 – 15 دقيقة ، وبعدها اغسليه بالماية
ماسك الشاي الاخضر + جل الالوفيرا:
لتجديد سريع للبشرة ، للتخلص من تعب وبهتان البشرة ، وتنقية حب الشباب ، ومنع الشيخوخة ، يبقى ده الماسك المناسب ليكي ، بسبب الشاي الاخضر اللي بيحتوي على فيتامينات C, PP, K, B ، اللي ممكن تحل لك كل المشاكل دي ، وجل الالوفيرا بيساعد على التئام حب الشباب ، وتقليل التجاعيد ، واضافة لمعان على البشرة.
امزجي 1 معلقة صغيرة من الشاي الاخضر مع 1 معلقة صغيرة من جل الالوفيرا ، وزعي الخليط على البشرة وسيبيه لمدة 30 دقيقة ، وبعدها اغسليه بالماية الباردة
ماسك ديتوكس البشرة:
ماسك لتطهير وتنضيف البشرة وازالة السموم من الجلد.
المكونات:
2 معلقة كبيرة طين البنتونيت.
1 معلقة كبيرة زيت جوز الهند.
½ معلقة كبيرة عسل نحل.
عصير ½ ليمونة او نقطة واحدة من زيت الليمون.
الطريقة:
اخلطي المكونات مع بعض كويس, حطي الماسك على البشرة, وسيبيه 10 دقايق, وبعدين اغسليه بالمية, ممكن تكرري الماسك مرة واحدة في الشهر ولو بشرتك دهنية ممكن تزودي تعمليه مرتين او تلاتة في الشهر.
ماسك زيت جوز الهند + كاكاو بودر:
ماسك الكاكاو من الماسكات الفعالة جدا لشباب البشرة بسبب فيتامين B5 ، وده بسبب تأثير وجود الثيوبرومين والثيوفيلين في تكوين الكاكاو ، ومع مزجه بزيت جوز الهند الماسك هيساعد على تغذية البشرة وترطيبها وفي نفس الوقت هيقشر الجزيئات الميتة من الطبقة السطحية للبشرة.
امزجي 1 معلقة كبيرة من الكاكاو البودر مع 1 معلقة صغيرة من زيت جوز الهند ، وزعي الخليط على البشرة وسيبيه لمدة 20 دقيقة ، وبعدها اغسلي بشرتك بالماية الدافية او بشاي البابونج البارد.
ماسك الافوكادو + العسل:
الافوكادو بيحتوي على البوتاسيوم, الكالسيوم, الصوديوم, الفوسفور, النحاس, الحديد, المغنيسيوم,
الزنك, وفيتامين E ، والافوكادو لما نجمعه مع العسل هيساعد على تغذية البشرة ويخليها مرنة.
اهرسي حبة افوكادو ، امزجي معاها معلقة كبيرة عسل ، وزعي الخليط على البشرة وسيبيه لمدة 15 دقيقة ،
ماسك الموز + الشوفان:
الماسك ده هيكون مثالي جدا للبشرة الجافة والحساسة ، الموز بيحتوي على فيتامين A, B,C ،
وهو بيغذي البشرة ويرطبها بشكل مثالي ، ، والشوفان بيساعد على تقشير البشرة.
امزجي 1 معلقة كبيرة من دقيق الشوفان مع 1 معلقة كبيرة من الموز المهروس ، وزعي الخليط على البشرة وسيبيه لمدة 20 دقيقة ، وبعدها اغسلي البشرة بالماية الدافية.
ماسك الدقيق وعصير البطاطس:
عشان توصلي لبشرة نضرة ومنورة ، اخلطي الدقيق وعصير البطاطس مع بعض ، الدقيق هيقشر الجلد الخشن ،وعصير البطاطس هيزيل الرؤوس السودا وهيدي بشرتك لمعان وهيفتح البشرة.
ابشري حبة بطاطس واحدة واستخرجي منها العصير ، وضيفي لها 6 معالق كبيرة دقيق ،
دلكي بشرتك بالخليط في حركات دائرية ، وبعدين سيبيه على البشرة لمدة 15 دقيقة ، وبعدين اغسليه بالمايه.
ماسك الخبز + اللبن:
الخبز يستخدم للبشرة لاحتوائه على الاحماض الامينية ومجموعة فيتامينات B, ومعادن PP ،
الماسكات المصنوعة من الخبز واللبن بتساعد على تقليل التجاعيد, وتنضيف الرؤوس السودا, وتقوية اوعية الوجه, وشفاء الالتهابات.
امزجي 1 معلقة كبيرة من الخبز مع 1 معلقة صغيرة من اللبن الدافي ، اهرسي الخليط بالشوكة لحد ما تتشكل عندك عجينة ناعمة ، وزعي العجينة على البشرة وسيبيها لمدة 15 دقيقة ، وبعدها اغسلي البشرة بالماية.
ماسك اقراص الفحم + الجيلاتين:
الجيلاتين بيحتوي على كولاجين طبيعي بيخترق الجلد بشكل مثالي ، والفحم بيساعد على تضييق المسام ، وبينضف المسام من الدهون ، وبيقلل من حب الشباب والبثور او الرؤوس البيضا والسودا ، وبيساعد على تقليل التهابات الجلد ، وبيطهر الجلد بشكل عميق.
دوبي 1 معلقة صغيرة من الجيلاتين في ماية دافية ، ضيفي لها قرص واحد من الفحم ، وزعي الخليط على البشرة وسيبيه لمدة 15 دقيقة ، وبعدها اغسليه بالماية الدافية
ماسك طين البنتونيت وخل التفاح:
لو بتعاني من الرؤوس السودا وحب الشباب يبقى الماسك ده هو الاختيار المناسب ليكي, كمان بيساعد على ازالة الشوائب والسموم من الجلد, تجديد انسجة الجلد, تقشير البشرة, تنعيم وترطيب البشرة, تقليل حجم المسام.
المكونات:
2 معلقة كبيرة طين البنتونيت.
2 معلقة كبيرة خل التفاح.
الطريقة:
اخلطي المكونات مع بعض كويس, حطي الخليط على البشرة, سيبيه من 10 – 20 دقيقة, وبعدين اغسليه بالمية.
ماسك بياض بيض + خيار:
لبشرة نضرة ومتوهجة استخدمي الماسك ده ، الخيار ليه تأثير مضاد للالتهابات وبالتالي بينضف البشرة ويلطفها ، وبياض البيض علاج مثالي للبشرة الدهنية ، وهيشد بشرتك.
امزجي ½ خيارة مع بياض بيضة مخفوقة ، وزعي الخليط على البشرة وسيبيه 15 دقيقة ، وبعدها اغسليه بالماية.
ماسك بياض البيض:
الماسك ده ليه مفعول سحري على البشرة الدهنية بشكل خاص, بيساعد على شد وتنعيم الجلد, وبيقلل حجم المسام, وبيساعد على تقليل الزيوت الزيادة من البشرة.
كل اللي هتعمليه هاتي بيضة افصلي الصفار عن البياض, خدي البياض وادهني بيه البشرة, سيبيه لحد ما ينشف حوالي 15 دقيقة, وبعدين اغسليه بمية دافية
ماسك ترطيب وتقشير البشرة:
بيساعد على تقشير الخلايا الميتة من البشرة, ومكوناته غنية بمضادات الاكسدة اللي بتغذي البشرة وبترطبها.
المكونات:
¼ ثمرة افوكادو مهروسة.
عصير شريحة ليمون.
½ معلقة كبيرة زيت زيتون.
1 معلقة كبيرة عسل نحل.
الطريقة:
اخلطي المكونات كلها مع بعض, هاتي فوطة مبلولة بمية سخنة واضغطي بيها على البشرة لمدة من 2 – 3 دقايق عشان تفتحي المسام, بعدها افردي الماسك على البشرة, سيبيه من 10 – 15 دقيقة, واغسليه بمية دافية.
ماسك تفتيح وشد البشرة:
الماسك بيساعد على تفتيح وشد البشرة, بيساعد على ترطيبها, بيفتح البقع الغامقة, وبيسرع شفاء الجلد.
المكونات:
1 بياض بيضة.
½ معلقة عسل نحل.
½ معلقة عصير ليمون.
الطريقة:
اخلطي المكونات مع بعض واضربيهم كويس بالشوكة لمدة من 1 – 2 دقيقة, ادهني بشرتك بالماسك, سيبية لمدة 30 دقيقة او لحد ما ينشف خالص وتحسي ان بشرتك مشدودة, وبعدها اغسليه بمية دافية, وبعدها مية باردة.
لا يوجد تعليقات
أضف تعليق