طريقة عمل اللازانيا بالبشاميل فاطمة ابو حاتى

 طريقة عمل اللازانيا بالبشاميل فاطمة ابو حاتى

 اللازانيا من الاكلات الايطالية المشهورة والتي يحبها الكبار والصغار  .. وسوف نوضح قدر الامكان  كل التكّات والتفاصيل وطبعاً كل الإضافات حسب رغبة وذوق كل واحد فى الأكل

في هذا المقال نقوم بشرح طريقة عمل اللازانيا بالبشاميل  بطريقة فاطمة ابو حاتى ومعرفة مقادير البشاميل وطريقة اللحمة المعصجة. 

طريقة عمل اللازانيا بالبشاميل فاطمة ابو حاتى

مكونات اللازانيا بالبشاميل فاطمةابوحاتي:

1- ٣ معالق زبدة.

2- ٤ معالق دقيق.

3- ٥ كوب لبن كامل الدسم.

4- ملح - فلفل - جوزة الطيب.

5- ٢ معلقة كبيرة جبنة كريمى (كنت نزلت طريقتها فى پوست سابق) أو ٣-٤ مثلثات جبنة.

طريقة عمل البشاميل فاطمةأبو حاتى:

• فى الزبدة هندى الدقيق تحميرة كده بس لونه مايغمقش وننزل عليه باللبن البتدريج (اللبن هيبقى كتير عن البشاميل العادى عشان بشاميل اللازانيا لازم يكون خفيف) مع التقليب المستمر عشان الدقيق مايكلكعش.

• نضيف الملح والفلفل وجوزة الطيب والجبنة الكريمى أو مثلثات الجبنة مع التقليب المستمر لحد ما القوام يتقل شوية (بس هيبقى أخف من البشاميل العادى) ونطفى عليه.

مقادير اللحمة المعصجة:

1- نص كيلو لحمة مفرومة خشن.

2- بصلتين كبار مقطعين + معلقتين زبدة.

3- مقدار من الصلصة المسبكة (شوية ثوم مفروم يتشوحوا فى حتة زبدة وننزل عليهم بمعلقتين كبار صلصة ونشوحهم ثم ننزل عليهم بعصير حبايتين طماطم ونضيف التوابل ونسيبها تتسبك لحد ما المياه تتبخر منها وقوامها يتقل).

4- ٢ كوب مرقة مغلى (أو ٢ كوب ماء مغلى وعليهم مكعب مرقة).

5- ملح .

6-  فلفل .

7-  زعتر.

8- بهارات .

9-  جوزة الطيب .

10- بودرة بصل .

11-  بودرة ثوم .

12-  حبهان .

13-  روزمارى.

14- معلقة كبيرة دبس رمان.

طريقة اللحمة المعصجة:

• هنشوح البصل مع الزبدة وننزل على البصل بكل التوابل تاخد تحميصة وتشويحه كده عشان ريحتهم تفوح.

• هننزل باللحمة المفرومة ونشوحها مع البصل والتوابل ولما اللحمة تبتدى تستوى ننزل عليها بدبس الرمان ونديها تقليبة حلوة ثم ننزل بالصلصة المسبكة.

• لما اللحمة تتعصج حلو هننزل عليها بالمرقة المغلية ونوطى النار ونسيبها تستوى (عشان يبقى فيه صوص فى اللحمة عشان اللازانيا تستوى فيه هو والبشاميل الخفيف).

كده إحنا جاهزين ... يللا نعمل بقى صينية اللازانيا

• هنجيب الصينية بتاعتنا ونحط فى قعرها مغرفة من البشاميل ونفرده كويس

• هنرص طبقة من اللازانيا وفوقها طبقة من البشاميل ثم طبقة من الجبنة المشكلة المبشورة (موتزاريللا - شيدر - رومى - بارميزان - حسب الرغبة) ثم طبقة من اللحمة المعصجة ثم طبقة من اللازانيا ثم البشاميل ثم الجبنة ثم اللحمة ثم اللازانيا ثم آخر مقدار البشاميل ونرش على الوش حتة قشطة أو شوية جبنة تخلى الوش يحمر

• هندخلها فرن سابق التسخين على حرارة ١٨٠° درجة لمدة من ٢٠-٢٥ دقيقة ولما تستوى والحروف تحمر هنطفى الفرن ونشغل الشواية لحد ما الوش يحمر وياخد لون

• هنطفى عليها ونطلعها ونسيبها تبرد قبل ما نقطعها عشان ماتتهريش مننا وبألف هنا

ملحوظة:

• عشان هنستخدم مواعين وأدوات مطبخ كتير يبقى أثناء ما فيه حاجة بتجهز على النار نغسل شوية مواعين بحيث نخلصهم أول بأول ومانتعبش من غسيلهم كلهم مرة واحدة .. ده غير منظرهم لو تراكموا هيسد النفس

• مافيش حاجة إسمها حد نفسه فى الأكل حلو وحد لأ ... الموضوع كله الإهتمام بالتفاصيل الصغيرة والتوابل والحاجات اللى بنضيفها تدى طعم وقوام أحلى فقط لا غير.